ഹോൺചർച്ച്: ലണ്ടനിലെ ഹോൺചർച്ചിൽ സംഘടിപ്പിച്ച സെവൻ ബീറ്റ്സ് സംഗീതോത്സവ വേദിയിൽ കലാസ്നേഹികളെ ആസ്വാദനത്തിന്റെ നെറുകയിലെത്തിച്ച അരങ്ങിൽ വിരിഞ്ഞത് വർണാഭമായ കലയുടെ മഴവിൽ വസന്തം.
ഹോൺചർച്ചിലെ ദ കാമ്പയിൻ സ്കൂൾ ഓഡിറ്റോറിയത്തിലും ഇടനാഴികകളിലും തിങ്ങി നിറഞ്ഞ നൂറുകണക്കിന് ആസ്വാദക ഹൃദയങ്ങൾ സെവൻ ബീറ്റ്സ് സീസൺ ഒമ്പതാം സംഗീതോത്സവത്തെ വരവേറ്റത് കഴിഞ്ഞ സീസണുകളിലെ സ്ഥിരതയാർന്ന സമ്പന്ന കലാ വിരുന്നിനും സംഘാടക മികവിനും ജീവ കാരുണ്യ പ്രവർത്തനങ്ങൾക്കുള്ള ആദരവും അംഗീകാരവും പ്രോത്സാഹനവുമായി.
ഉച്ചയ്ക്ക് രണ്ടിന് ആരംഭിച്ച സംഗീതോത്സവം രാത്രി 11 വരെ നീണ്ടുനിന്നു. യുക്മ ദേശീയ പ്രസിഡന്റും സാമൂഹ്യ പ്രവർത്തകനുമായ അഡ്വ. എബി സെബാസ്റ്റ്യൻ സെവൻ ബീറ്റ്സ് സംഗീതോത്സവത്തിന്റെ ഔപചാരികമായ ഉദ്ഘാടന കർമം നിർവ്വഹിക്കുകയും ആശംസകൾ നേർന്നു സംസാരിക്കുകയും ചെയ്തു.
പ്രശസ്ത നടി സനുഷാ സന്തോഷ് വിശിഷ്ടാതിഥിയായി പങ്കുചേരുകയും ആശംസകൾ നേരുകയും ചെയ്തു. സെവൻ ബീറ്റ്സിന്റെ സംഗീതോത്സവ ഉദ്ഘാടന വേദിയിൽ കോഓർഡിനേറ്ററും യുഗ്മ നാഷണൽ കമ്മിറ്റി ജോ. സെക്രട്ടറിയുമായ സണ്ണിമോൻ മത്തായി അധ്യക്ഷത വഹിച്ചു.